«Кэнчээри» 2-с кыра бөлөх

Кэнчээрилиир ыччаппыт

Үүн-сайын, чэчирээ,

Төрөөбүт төрүт тылгын

Кыраҕыттан харыстаа!..

2019-2020 үө.дь. саҥа саха бөлөҕө аһыллан үлэтин саҕалаата. Иитээччилэринэн
1-кы категориялаах баспытаатал Аграфена Ивановна Бурнашева уонна Алена Антоновна Сидорова, онтон иитээччи көмөлөһөөччүлэринэн Анна Валерьевна Олесова уонна Надежда Ефремовна Ефимова үлэлииллэр. Бөлөхпүтүгэр уопсайа 29 оҕо сылдьар: 11 кыыс уонна 18 уол.

Иитэр-үөрэтэр үлэбит “От рождения до школы” уонна “Тосхол” диэн оскуолаҕа киириэн иннинээҕи саастаах оҕолорго анаммыт бырагыраамаларынан сүрүннэнэр. Оҕо уопсастыбаҕа сылдьар, бодоруһар дьоҕурун, этин-хаанын, тылын-өһүн, билэр-көрөр уонна кэрэни өйдүүр дьоҕурдарын сайыннарар биэс хайысханы тутуһан үлэлиибит. Ол курдук, нэдиэлэ ахсын тулалыыр эйгэ, ахсаан, уруһуй, эти-хааны эрчийии, муусука, мэһийии, сыһыарыы, лего дьарыктара ыытыллар. Маны иитээччилэр, физкультура инструктора, муусука салайааччыта, педагогтар тэрийэн дьарыктыыллар.

Биллэн турар, иитэр-үөрэтэр үлэбит төрөппүттэри кытары ыкса ситимнээхтик барар. Быйылгы үөрэх дьылыгар 4 киһилээх төрөппүт кэмитиэтин талан үлэбитин тэтимнээхтик саҕалаатыбыт. Бэрэссэдээтэлинэн Алена Ивановна Дьяконова, көмөлөһөөччүлэринэн Ираида Иннокентьевна Федорова, Анна Сергеевна Семенова уонна Василий Васильевич Гоголев уопсай сүбэнэн талыллан үлэлии-хамныы, иитээччилэргэ төһүү күүс буола сылдьаллар.

Төһө да кыра бөлөх буолларбыт, уһуйаан тэрийэн ыытар бары тэрээһиннэригэр көхтөөхтүк кыттабыт, бэйэбитин көрдөрөбүт, үүнэбит-сайдабыт.

Кэнчээрилиир ыччаппыт бары өттүнэн сайдыылаах буолан тахсарыгар иитээччилиин-төрөппүттүүн күүспүтүн-уохпутун биэрэн айымньылаахтык үлэлиибит.