Бу дьыл муус устар 26 күнүгэр «Кэнчээри» орто бөлөххө Өрөспүүбүлүкэ күнүн көрсө «Саха төрүт оонньуулара» диэн спортивнай көччүйүү ыытылынна.

Оҕолор уруһуй дьарыгар бэйэлэрэ оҥорбут саха былаахтарын тутан, өрөгөй ырыатынан саалаҕа хааман киирдилэр. Ол кэннэ иитээччилэр Сидорова А.А. уонна Егорова Л.П. остуол оонньууларын оонньоон көрдөрдүлэр. Салгыы оҕолор түөрт көрүҥҥэ күрэхтэстилэр. Ол курдук, «Эрийии», «Ыараханы көтөҕүү», «Ойбонтон уулааһын» уонна «Уҥуоҕу тап» диэн. Оонньуу түмүгүнэн саамай уустук көрүҥнэринэн «Ойбонтон уулааһын» уонна «Уҥуоҕу тап» буоллулар. Кырдьыга даҕаны, өбүгэлэрбит бэрт мындыр оонньуулаахтарын итэҕэйдибит. Манна киһи сымсата, бэргэнэ, күүһэ, түргэнэ, толкуйа барыта түмүллэр эбит. Оҕолор бэркэ сэргээтилэр, өссө да өрүү оонньуохпут дэстибит, ону таһынан атын да оонньуу көрүҥнэрин сыыйа-баайа киллэрэн иһиэхпит турдаҕа.

Тэрээһин түмүгэр көхтөөхтүк кыттыбыт бары оҕолорго кыра сэмэй бириис туттарыллан үөрүүлэрэ үрдээтэ.